OG NOEN HAR LAGET DEM, TENKTE HUN

Sundag 9.oktober kl.14 opnar vi ny utstilling på Norsk Trikotasjemuseum. Kunstnarane Agnes Bakke Murud og Rachel E. Huglen har latt seg inspirere av livet og historia til fabrikken og laga kunstverk inspirert av Norsk Trikotasjemuseums tekstile identitet. Marte Mjøs Persen (ordførarkanditaten frå AP) opnar utstillinga. Gratis inngang og open kafe.

Utstillinga vil stå i perioden 9.oktober 2011 til april 2012. Begge kunstnarane arbeider med tekstile uttrykk, og er utdanna ved Kunsthøgskolen i Bergen.

AGNES BAKKE MURUD

Agnes Bakke Murud er nyutdanna tekstilkunstner, og gjekk ut frå Kunsthøgskulen i Bergen våren 2010. Med utgangspunkt i fotografi og teikningar arbeider ho hovudsakeleg med silketrykkteknikk på tekstile materialar.

I arbeidet med denne utstillinga har ho teke utgangspunkt i den gamle fabrikken. Foto av gamle kardemaskinar og strikkemaskinar på fabrikken er blitt bearbeida på data for så å bli overført til silketrykkrammer. Resultatet er ein serie arbeider med trykte og utbrente tekstilar.

Publikum som har vore på omvisning i museet vil kunne kjenne igjen elementa som er brukte i stofftrykka.

Agnes Bakke Murud er fødd 1978 i Bodø, og bur no i Indre Arna.

RACHEL E. HUGLEN

Rachel E. Huglen har bachelor frå Kunsthøgskulen i Bergen, og går no siste året på mastergraden i kunst.

”Inspirert av Norsk Trikotasjemuseums tekstile identitet presenterer eg her for publikum arbeid som på ulike måtar held seg til tekstil som materiale og kunstnarisk uttrykksmiddel. Sjølv om eg nyttar tradisjonelle teknikkar som trykk, vev og draperi er det ikkje teknikken som er mitt høgsete, men tekstil som middel for refleksjon og forteljing.”

Rachel E. Huglen er fødd 1979 på Stord, og bur i Bergen.