Havråtunet
Havråtunet ligg lunt og sørvendt på Solstranda på Osterøy. Jorda er fruktbar og mange varmekjære plantearter veks i dei bratte liene. Med utsyn over Sørfjorden ligg garden Havrå midt i eit særprega kulturlandskap. På garden er klyngetunet og den gamle teigdelinga framleis intakt. Garden er eit unikt minne om gardsdrift, byggjeskikk og arbeidsliv på dei mangbølte vestlandsgardane. Her er drift på 3 av bruka med gamle norske husdyrrasar, korn og potetar.
Havrå er ein gard med ei historie som strekker seg tilbake til bronsealderen. Garden vart freda i 1998 etter §20 i Kulturminnelova, som det første kulturmiljø i Noreg. Føremålet er å sikre at dette eineståande nasjonale fjordgardsanlegget til ein kvar tid skal vera ein historisk referanse og kjelde til kunnskap. Det oppnår ein ved å drive garden slik det er nedfelt i fredningsvedtektene.
